Në emër të Fakultetit të Arteve të Universitetit të Prishtinës, me dhimbje të thellë njoftojmë se është ndarë nga jeta aktori i përmasave ndërkombëtare dhe profesori ynë i shquar, profesor emeritus, Prof. Enver Petrovci.

Kujtojmë se figura e tij është nga më të ndritura që njeh kultura dhe artit shqiptar.

Profesor Petrovci ishte një personalitet i jashtëzakonshëm që la gjurmë të pashlyeshme në teatrin, filmin dhe arsimin universitar.
Me interpretimet e tij brilante dhe kontributin akademik të palodhur, ai u bë shembull frymëzimi për gjenerata të tëra studentësh dhe një gur themeli i Fakultetit tonë.

Në cilësinë e mësimdhënësit dhe krijuesit, ai i dha kulturës sonë kombëtare një pasuri të pakrahasueshme, duke e lartësuar emrin e Universitetit të Prishtinës dhe të mbarë skenës sonë artistike.

Fakulteti i Arteve i Universitetit të Prishtinës e humbi një koleg dhe mësues të vyer, ndërsa shoqëria jonë një artist të madh. Kujtimi, vepra dhe mësimet e tij do të mbeten përherë pjesë e identitetit tonë kulturor e akademik.

Në këto momente të dhimbshme, në emër të Fakultetit të Arteve të Universitetit të Prishtinës, u shprehim ngushëllimet më të sinqerta familjes, miqve, kolegëve, studentëve dhe gjithë dashamirëve të profesorit tonë të nderuar.

Qoftë i paharruar kujtimi i tij!

Prof. Hazir Haziri

Dekan i Fakulteti të Arteve