Në një aktivitet të veçantë akademik, Prof. Asoc. Rreze Kryeziu Breznica zhvilloi një ligjëratë në Universitetin Fryderyk Chopin të Muzikës në Varshavë, Poloni – universiteti më i vjetër dhe më i madh i arsimit të lartë muzikor në Poloni, i njohur ndërkombëtarisht për kontributin e tij të jashtëzakonshëm në muzikën klasike dhe edukimin muzikor.

Gjatë prezantimit, Prof. Kryeziu Breznica theksoi faktorët kryesorë dhe komponentët e muzikës artistike shqiptare, duke trajtuar ndikimet historike, zhvillimin institucional, veprimtarinë e kompozitorëve dhe rolin e brezave të rinj. Ligjërata u zhvillua në Sallën Karol Szymanowski, ku studentët e Departamentit të Kompozimit ndoqën me interes dhe kureshtje diskutimin mbi trashëgiminë dhe potencialin e muzikës artistike të Kosovës.

Ky aktivitet shënon një hap të rëndësishëm në promovimin ndërkombëtar të muzikës artistike të Kosovës dhe vazhdimin e bashkëpunimeve kulturore dhe akademike me institucione prestigjioze ndërkombëtare.